सैनामैना, कार्तिक २८ ।
रुपन्देहीको सैनामैना–३, मुर्गिया स्थित नवदुर्गा भवानी शैलापुत्री शक्ति पिठमा करोड दिप प्रज्वलन गरिएको छ । मन्दिरको ५० औं वर्ष पूरा भएको अवसरमा हरिबोधनी एकादशीका दिन मंगलबार एक कार्यक्रमको आयोजना गरि करोड दिप प्रज्वलन गरिएको मन्दिर व्यवास्थापन समितिले जनाएको छ ।
दिप प्रज्वलन कार्यक्रममा सैनामैना लगाएत अन्य पालिकाहरुबाट समेत गरि हजारौं श्रद्धालुभक्तजनहरुको सहभागिता रहेको थियो । सैनामैनाको इतिहासमा पहिलो पटक करोड बढी दिप प्रज्वलन गरिएको मन्दिर व्यवस्थापन समितिका अध्यक्ष कृष्ण प्रसाद कंडेलले बताउनुभयो । ‘श्रद्धालुभक्तजनहरुको उत्साहजनक सहभागिताले हामीलाई उत्साह थपेको छ, हामीले एक करोड दिप प्रज्वलन गर्ने भनेका थिएऔं तर भक्तजनहरुको उत्सहले करिब डेढकरोड दिप प्रज्वलन गर्न सफल भयौं’–उहाँले भन्नुभयो । दिप प्रज्वलनका लागि विभिन्न टोल विकास संस्था, आमासमुह र भक्तजनहरुले नाम टिपाई दिप (धागो)बनाई दिप प्रज्वलनमा सहभागी भएका थिए ।
पुजाको आरम्भ पश्चात श्रीमद् भागवत पाठपारायण, वेद, चण्डी, गीतापाठपारायण, रुद्राभिषेक, करोड दिप प्रज्वलन, तुलसी विवाह, श्रृड्डारिक सन्धयाकालिन महाआराति प्रज्वलन र भजन कृतन सहितका कार्यक्रम विहान देखि साँझसम्म गरिएको मन्दिर व्यवस्थापन समितिका सचिव गोकर्ण आचार्यले बताउनुभयो ।
मन्दिरको ५० औं वर्ष पूरा भएको अवसर पारि २०८१ श्रवण २ गते देखि प्रत्येक महिनाको एकादशीमा श्रृड्डारिक सन्ध्याकालिन महाआराति सहित मन्दिरमा भजनकृतन गरिदै आएको थियो ।
मन्दिरको २०३१ सालमा स्थापन गरिएको थियो । अहिले नवादुर्गा मन्दिरको शैलापुत्री शक्ति पिठका रुपमा विकास गर्ने गरी गुरुयोजना सहित यस क्षेत्रकै महत्त्वपुर्ण धार्मीक पर्यटनको रुपमा विकास गर्ने गरि मन्दिरको पुनः निर्माणको काम समेत थालिएको छ । जस अन्तरगत गेट निर्माण र बाउण्डरीका काम भैरहेका छन् ।
