सैनामैना, २०८१ भाद्र १२
सैनामैना, भाद्र १२ गते – नेपाल रेडक्रस सोसाइटी सैनामैना उपशाखा (पर्रोहा)को आयोजनामा तथा पर्रोहा माध्यमिक विद्यालयको आतिथ्यतामा सैनामैना-४ मा “मानवतालाई जीवित राखौँ” शीर्षकमा युरेस र जुरेस स्तरीय वक्तृत्वकला प्रतियोगिता सम्पन्न भयो। कार्यक्रमको आयोजना विद्यालयको सभाहलमा गरिएको थियो।
कार्यक्रमको अध्यक्षता उपशाखा सभापति मिना भण्डारीले गर्नुभएको थियो भने प्रमुख अतिथि नेपाल रेडक्रस सोसाइटी लुम्बिनी प्रदेश सभापति लालप्रसाद पंगेनी हुनुहुन्थ्यो। विशिष्ट अतिथिहरूमा सैनामैना वडा नं. ४ का वडाध्यक्ष रामप्रसाद अधिकारी, पर्रोहा माध्यमिक विद्यालयका प्रधानाध्यापक बलबहादुर केसी, र रेडक्रसका पूर्व सचिव शिवलाल गौतम रहेका थिए। कार्यक्रममा विभिन्न विद्यालयका करिब २५ जना विद्यार्थी तथा शिक्षकहरूको उपस्थिति रहेको थियो।
वक्तृत्वकला प्रतियोगितामा युरेस समूहतर्फ सुनगाभा पब्लिक माविकी छात्रा दिव्यानी गौतमले प्रथम स्थान प्राप्त गरिन्। द्दितीय स्थानमा प्रभात इङ्गलिश बोर्डिङ्ग सेकेन्डरी स्कुलकी छात्रा प्रकृति भण्डारी र तृतीय स्थानमा प्रभात स्कुलकै कुसुम कार्की रहेका थिए। जुरेस समूहतर्फ न्यु एकेडेमी बोर्डिङ्ग स्कुलकी छात्रा सदिक्षा थापा क्षेत्री प्रथम, रुपन्देही मोर्डन स्कुलकी छात्रा कृष्मा सापकोटा द्दितीय, र सैनामैना मेमोरियल बोर्डिङ्ग स्कुलकी छात्रा पार्सा खत्री तृतीय स्थानमा विजयी भए।
सफल विद्यार्थीहरूलाई ट्रफी र प्रमाणपत्र वितरण गरियो। युरेस र जुरेसका प्रथम विजेताहरूले आगामी भाद्र १९ गते रेडक्रस सोसाइटी रुपन्देही जिल्ला शाखाले आयोजना गर्ने जिल्लास्तरीय वक्तृत्वकला प्रतियोगितामा भाग लिने अवसर पाउनेछन्।
कार्यक्रमका प्रमुख अतिथि लालप्रसाद पंगेनीले रेडक्रसले विपद्को समयमा सरकारसँग सहकार्य गर्दै आएको बताउँदै, यस्ता कार्यक्रमहरूले विद्यार्थीहरूमा प्रतिभा प्रस्फुटन गर्न मद्दत पुग्ने विचार व्यक्त गर्नुभयो। सभापति मिना भण्डारीले मानवीय कार्यलाई निरन्तरता दिनका लागि सबैको हातेमालो आवश्यक रहेको बताउनुभयो।
कार्यक्रम उपशाखाका सदस्य विवेक चालिसेको संयोजकत्वमा, कोषाध्यक्ष विक्रम पौडेलको स्वागत भाषण र सचिव थानिश्वर न्यौपानेको सञ्चालनमा सम्पन्न भयो।
