१९ साउन ।
लुम्बिनीका मुख्यमन्त्री चेतनारायण आचार्यले बुटवलमा मुख्यमन्त्रीको सम्पर्क कार्यालय तथा निवासलाई पुनः सञ्चालनमा ल्याएका छन् ।
यसअघिका मुख्यमन्त्री जोखबहादुर महराले हटाएको बुटवल मिलनचोकको सडक विभाग परिसरमा रहेको राजश्व अनुसन्धान कार्यालयको भवनमा रहेको मुख्यमन्त्रीकाे सम्पर्क कार्यालयलाई बर्तमान मुख्यमन्त्री आचार्यले पुनः सञ्चालनमा ल्याएका हुन् ।
लुम्बिनी प्रदेशका संस्थापक मुख्यमन्त्री शंकर पोखरेलको पालादेखि ०७४ सालबाट सो भवनमा मुख्यमन्त्रीको निवास थियो । प्रदेश राजधानी दाङको देउखुरी उपत्यका सरेपछि उक्त निवासलाई मुख्यमन्त्रीकाे सम्पर्क कार्यालय बनाइएको थियो ।
बुटवलमा प्रदेश प्रमुखको कार्यालय र प्रदेश सरकार मातहतका निर्देशनालय सहित अन्य धेरै सरकारी कार्यालय पनि बुटवलमै रहेकाले सम्पर्क कार्यालय आवश्यक भएको मुख्यमन्त्री आचार्यकाे भनाइ छ ।
मुख्यमन्त्री आचार्यले आफू हरेक शुक्रबार बुटवलमा आउने र आइतबार बिहानसम्म बस्ने बताए ।
सम्पर्क कार्यालयमा एक जना सचिवालयका कर्मचारी राख्ने उनले बताए ।
यसअघिका मुख्यमन्त्री महराले बुटवलमा महंगो भाडा तिरेर सम्पर्क कार्यालय राख्न आवश्यक नभएको भन्दै हटाएका थिए ।
बुटवलमा मुख्यमन्त्री आउँदा होटलमा बस्नुपर्ने, सचिवालयसहित सुरक्षा टोली बस्दा धेरै खर्च हुने तर्क गर्दै सम्पर्क कार्यालयका लागि सानो इकाइको व्यवस्था गरिएको सरकारका प्रवक्ता मन्त्री दिनेश पन्थीले जानकारी दिए ।
