सैनामैना।
रुपन्देहीको सैनामैनामा सैनामैना दुधराक्ष कप राष्ट्रिय क्लव स्तरीय पुरुष भलिबल प्रतियोगिता हुने भएको छ । दुधराक्ष युवा क्लवको आयोजनामा माघ २५ गते देखी फागुन ३ गते सम्म उक्त भलिबल प्रतियोगिता आयोजन गर्न लागिएको हो । प्रतियोगिता सैनामैना–६, कलौनी चोक लुम्बिनी रोड खेलमैदानमा सञ्चालन हुने छ ।
क्लवले भलिवल सञ्चालन गर्नका लागि नेपाल भलिबल संघमा मंसिर १० गते पत्रचार गरेको थियो उक्त प्रत्रका आधारमा माघ २५ गते दखि फागुन ३ गते सम्मका लागि संघले सैनामैना दुधराक्ष कप राष्ट्रिय क्लव स्तरीय पुरुष भलिबल प्रतियोगिता सञ्चालनका लागि अनुमति दिएको छ । पत्रमा अन्तर्राष्ट्रिय भलिवल महासंघ (FIVB) र नेपाल भलिबल संघको नीती नियम भित्र रहि प्रतियोगिता सञ्चालन गर्न स्वीकृती प्रदान गरिएको छ ।
प्रतियोगितामा राष्ट्रिय स्तरका क्लवहरु टिप टप हेल्प नेपाल, गण्डकी भलिवल क्लव, मणिमुकुन्द भलिवल क्लव लगायतका चर्चित क्लवहरूलाई सहभागी गराउने दुधराक्ष युवा क्लवका अध्यक्ष किरन पोख्रेलले जानकारी गराउनुुभयो । प्रतियोगितामा प्रथम, द्वितीय र तृतीय हुने टिमलाई नगद, शिल्ड, मेडल र प्रमाण पत्रले सम्मान गरिने क्लवका सचिव पदम पाण्डेले बताउनुभयो । पाण्डेले नगद पुरस्कार भने छिट्टै पत्रकार सम्मेलन गरेर घोषणा गर्ने जानकारी गराउनुभयो ।
रुपन्देही जिल्लाको सैनामैना ६ मा वि.स. २०६१ सालमा स्थापना भएको दधराक्ष युवा क्लव स्थापना काल देखिनै सामाजिक क्षेत्रमा सकृय क्लवको रुपमा स्थापित छ । क्लवले गत वर्ष पनि खेलकुद क्षेत्रको विकास गर्दै खेलाडी उत्पादन गर्ने उद्देश्यले स्व. ढुण्डी थरुनी स्मृति कपअन्तर्गत जिल्लास्तरीय भलिबल प्रतियोगिता सम्पन्न गरेको थियो ।
