सैनामैना, मंसिर १४
“सबैका लागि खेलकुद, स्वास्थ्यका लागि खेलकुद” भन्ने मूल नारासहित सैनामैना व्याडमिन्टन क्लबले नगरस्तरीय व्याडमिन्टन प्रतियोगिता आयोजना गर्ने भएको छ। क्लबका अध्यक्ष पितम्बर (धर्म) न्यौपानेका अनुसार प्रतियोगिता मंसिर १५ गते क्लबको सैनामैना–३ स्थित कभर्ड हलमा सञ्चालन हुनेछ।
प्रतियोगिता खुला व्याडमिन्टन, भेट्रान (४० वर्ष माथि), र सुपर भेट्रान (५० वर्ष माथि) गरी तीन विधामा विभाजन गरिएको छ। इच्छुक खेलाडीहरूले मंसिर १४ गतेभित्र आफ्नो नाम दर्ता गराउन आग्रह गरिएको छ।
प्रतियोगितामा प्रथम स्थान हासिल गर्ने टोलीले रु १५,००० नगद पुरस्कार र प्रमाणपत्र प्राप्त गर्नेछन्। द्वितीय स्थानलाई रु १०,००० नगद र प्रमाणपत्र तथा तृतीय स्थानलाई रु ५,००० नगद र प्रमाणपत्र प्रदान गरिनेछ। क्लबका सचिव प्रकाश पौडेलले प्रतियोगितामा करिब ५० टोलीको सहभागिता हुने अनुमान गरिएको जानकारी दिनुभयो।
साथै, खेलकुदलाई नगरबासीहरूमाझ अझ लोकप्रिय बनाउने उद्देश्यले प्रतियोगितालाई विशेष रूपमा व्यवस्थित गरिएको छ। आयोजकले खेलाडी र दर्शकहरूको उत्साहलाई ध्यानमा राख्दै प्रतियोगिताको तयारी पुरा भएको बताएको छ। प्रतियोगिता बिहान ८ बजेबाट सुरु हुनेछ।
यो प्रतियोगिता खेलकुदप्रति स्थानीयको रुचि बढाउन र शारीरिक फिटनेसको महत्त्वप्रति सचेतना फैलाउन थप योगदान दिने विश्वास गरिएको छ।
