१७ कात्तिक ।
बुटवल उपमहानगरपालिकाले शिवनगर सामुदायिक बनमा रहेको नन्दनी गौशालामा गाईपूजा गरेको छ । तिहारको अवसरमा जनप्रतिनिधि, गौंसंरक्षण अभियान्ता तथा स्थानीयहरुको सहभागितामा विधिपूर्वक गाईपूजाको आयोजना गरिएको हो ।
उपमहानगरपालिकाका प्रमुख खेलराज पाण्डेयले गाईको संरक्षणको लागि स्थानीय तह आफैले नै गाईपूजाको आयोजना गरेको बताउँदै गौशालाको व्यवस्थापनका लागि उपमहानगरपालिकाले योजना बनाएर काम गरिरहेको बताए । खुल्ला सीमाना र तस्करका कारण छाडाचौपायाँको संख्या सडकमा बढ्दै गएकाले नियन्त्रणको आवश्यकता रहेकोमा उनले जोड दिए ।
उपमहानगरपालिकाका उपप्रमुख सावित्रादेवी अर्यालले गाईको पूजासँगै संरक्षणमा जुट्नको लागि सबैलाई आग्रह गरिन् । थोरै बजेट र जनशिक्तले मात्र छाडा चौपायाको नियन्त्रण हुन नसक्ने बताउँदै सबै मिल्न सके मात्र छाडा चौपायालाई नियन्त्रण गर्न सकिने उनले बताइन् । नन्दिनी गौशालामा पनि स्रोत अभावमा धेरै चौपायाको व्यवस्थापन गर्न समस्या देखिने गरेको छ ।
उपमहानगरपालिका र शिवनगर सामुदायिक वन उपभोक्ता समूहले संयुक्त रूपमा गौशाला तथा गौ संरक्षण केन्द्र स्थापना गरेका थिए ।
करिब ६ बिगाहा क्षेत्रफलमा तारजाली गरी बनाइएको गौशालामा घामपानीबाट पशु चौपायालाई जोगाउन सेडको समेत अभाव छ ।
कात्तिक कृष्ण औंशीको दिन गौंशालामा रहेका गाईलाइ पुजाआजा गरी नुनतेल खुवाएमा लक्ष्मीको सधैभरि घरमा बास हुने र अन्य रोग व्याधीहरुले समेत सताउँदैन भन्ने धार्मिक मान्यता छ ।
