सैनामैना ।
पर्रोहा माध्यमिक विद्यालयमा शिक्षक अभिभावक संघको नव गठित कार्यसमितिको बैठक सम्पन्न भएको छ। विद्यालयको शैक्षिक र भौतिक विकासलाई गति दिनका लागि संघका प्रत्येक सदस्यहरूले मासिक रूपमा विद्यालयको गतिविधि अनुगमन गर्ने निर्णय गरेका हुन।
बैठकमा शिक्षक अभिभावक संघका अध्यक्ष नरेन्द्र पोख्रेल शर्माले विद्यालयको शैक्षिक स्थितिलाई अझ प्रभावकारी बनाउन र भौतिक संरचना विकासमा थप सुधारका लागि विद्यालय प्रशासन, शिक्षक, र अभिभावक बीच सशक्त सहकार्य गर्नुपर्ने आवश्यकता औंल्याउँनु भएको थियो ।
बैठकमा विद्यालयका प्रधानाध्यापक बल बहादुर केसीले शिक्षक र अभिभावकहरूको सहकार्यले मात्र विद्यालयलाई आदर्श र नमुना शिक्षण संस्थामा रूपान्तरण गर्न सकिने बताउँदै, सामूहिक प्रयासमार्फत विद्यार्थीहरूलाई आधुनिक र व्यावहारिक शिक्षा प्रदान गर्न सकिने धारणा व्यक्त गर्नुभएको थियो।
यस्तै, शिक्षक प्रतिनिधि भवानी ज्ञवालीले विद्यार्थीहरूको उज्ज्वल भविष्य सुनिश्चित गर्नका लागि विद्यालयले हरेक पक्षमा नियमित समीक्षा र सुधार गर्दै आएको र यस कार्यका लागि शिक्षक समुदाय पूर्ण रूपले प्रतिबद्ध रहेको धारणा राख्नुभएको थियो।
विद्यालय व्यवस्थापन समितिका अध्यक्ष रामप्रसाद अधिकारीले विद्यालयको दीर्घकालीन विकास र सुदृढीकरणका लागि शिक्षक, अभिभावक र समुदायको साझा प्रयासको खाँचो रहेको बताउँदै विद्यालयलाई उदाहरणीय बनाउन सबैतर्फ आवश्यक स्रोत साधनको व्यवस्थापन गर्न आफू प्रतिबद्ध रहेको धारणा व्यक्त गर्नुभएको थियो।
विद्यालयका शिक्षक प्रतिनिधि सहायक प्राचार्य हरिप्रसाद भट्टराईले विद्यालयलाई गुणस्तरको शिक्षामा उत्कृष्ट बनाउन सबैको सक्रिय सहभागिताको आवश्यकता रहेको विदयालयको शैक्षिक वातावरणलाई अझ सुदृढ बनाउने कुरा बताउनुभएको थियो। विद्यालयमा हाल विद्यार्थी संख्या बढ्दो क्रममा रहेको र आगामी वर्ष थप नयाँ कार्यक्रमहरू लागू गरिने जानकारी पनि बैठकमा गराइएको थियो।
पर्रोहा माध्यमिक विद्यालय सैनामैनाको एक प्रतिष्ठित सामुदायिक विद्यालय हो। यसले शैक्षिक क्षेत्रमा उत्कृष्ट नतिजा हासिल गर्दै आएको छ। विद्यालयले कक्षा १२ सम्मको पढाइ प्रदान गर्दै व्यवस्थापन र शिक्षा शास्त्र संकायमा विद्यार्थीहरूलाई गुणस्तरीय शिक्षा उपलब्ध गराउँदै आइरहेको छ
